ភ្នំពេញ៖ ក្រសួងសុខាភិបាលបានណែនាំពលរដ្ឋប្រយ័ត្ន បង្ការ និងទប់ស្កាត់នូវអគ្គិភ័យឆេះផ្ទះសម្បែងក្នុងរដូវក្តៅ។ ជាមួយគ្នានេះក្រសួងប្រាប់ពលរដ្ឋពិសាទឹកឱ្យបានលើសពី២លីត្រក្នុងមួយថ្ងៃ បើទោះបីមិនស្រេកទឹកក៏ដោយ។
ក្រសួងសុខាភិបាលក៏បានអំពាវនាវពលរដ្ឋខណៈអាកាសធាតុក្តៅ កុំស្ថិតនៅក្រោមកំដៅថ្ងៃយូរពេក ហើយថែរក្សាសុខភាពផ្ទាល់ខ្លួនឱ្យបានល្អ។ ក្រសួងសុខាភិបាលអំពាវនាវបែបនេះ ក្រោយពីសង្កេតឃើញថា ជារៀងរាល់ថ្ងៃមានករណីអគ្គិភ័យឆាបឆេះផ្ទះសម្បែងពលរដ្ឋជាច្រើនករណី។
ក្រសួងការងារ និងបណ្តុះបណ្តាលវិជ្ជាជីវៈ ក៏បានណែនាំដល់សហគ្រាស និងគ្រឹះស្ថានទាំងអស់ត្រូវទប់ស្កាត់ និងបង្ការអគ្គិភ័យ ដើម្បីជៀសកុំឱ្យប៉ះពាល់ដល់ដំណើរការអាជីវកម្ម សុវត្ថិភាព និងសុខភាពការងាររបស់កម្មករនិយោជិត និងសន្តិសុខសណ្តាប់ធ្នាប់សាធារណៈ៕
